இதன் மூலம் ஏழை எளிய மக்கள் பயன் பெறுவர். நாடு முழுவதும் வருமான வரி செலுத்துவோருக்கு பான் கார்டு அளிக்கப்பட்டுள்ளது. இந்த எண் என்பது குறிப்பிட்ட நபரை மட்டுமே குறிப்பிடுவதாக அமைந்துள்ளது. அதை போலவே அரசாங்கத்தின் வறுமை ஒழிப்பு நலத்திட்டங்கள் மூலம் பயன் பெறும் அடித்தட்டு மக்களுக்கும் அடையாள எண் அட்டை வழங்க மத்திய அரசு முடிவு செய்துள்ளது.
மொத்தம் 12 இலக்கங்களை கொண்டிருக்கும் இந்த எண்ணுக்கு "ஆதார் எண்' என்று பெயரிடப்பட்டுள்ளது. இந்த ஆதார் எண்ணை வழங்குவதற்கும் இதுகுறித்த பணிகளை மேற்கொள்வதற்கும் ஒரு அதிகார அமைப்பு நிறுவப்படவுள்ளது. தேசிய "அடையாள எண் அதிகார அமைப்பு' என்ற பெயரில் இந்த அமைப்பு இயங்கும். ஏழை மக்களுக்கு அடையாள அட்டை வழங்குவது குறித்தும், அந்த எண்களை நிர்ணயிப்பது குறித்தும் இந்த திட்டத்தை எப்படி அமல்படுத்துவது என்பது குறித்தும் இந்த அதிகார அமைப்பு முடிவு செய்யும். இந்த திட்டத்தை நிறைவேற்ற வகை செய்யும் சட்ட மசோதாவை எதிர்வரும் குளிர்கால பார்லிமென்ட் கூட்டத்தொடரில் அறிமுகம் செய்யவும் தீர்மானிக்கப்பட்டுள்ளது. இதற்கு நேற்று மத்திய அமைச்சரவை கூட்டம் ஒப்புதல் அளித்தது.
இந்த திட்டத்தை ஆரம்பித்து வைக்கும் விதமாக முதல் ஆதார் எண்ணை காங்கிரஸ் தலைவர் சோனியா அறிமுகம் செய்து வைக்கிறார். மகாராஷ்டிராவில் உள்ள நந்தூர் பார் என்ற இடத்தில் பழங்குடியினத்தைச் சேர்ந்த ஒருவருக்கு முதல் ஆதார் எண்ணை சோனியா வழங்கவுள்ளார்.
பிரதமர் மன்மோகன் சிங்கும் பங்கேற்கும் இந்த அறிமுக நிகழ்ச்சி வரும் 29ம் தேதி அன்று நடைபெறவுள்ளது. முதல் கட்டமாக 10 கோடி ஏழைகளை கண்டறிந்து அவர்களுக்கு ஆதார் எண்களை அளிக்க திட்டங்கள் வகுக்கப்பட்டுள்ளன. இதற்கு 3 ஆயிரத்து 23 கோடி ரூபாய் வரை செலவிடவும் திட்டமிடப்பட்டுள்ளது. பிரதமர் மற்றும் எதிர்க்கட்சி தலைவர் மற்றும் ஒரு மத்திய அமைச்சர் ஆகியோர் அடங்கிய மூன்று பேர் குழு இத்திட்டத்தை கண்காணிக்கும் என்று மத்திய அரசு தெரிவித்துள்ளது.
No comments:
Post a Comment